恭喜粵華中學A隊 五年冠

恭喜粵華A隊奪得2017-2018年度學界足球賽冠軍,各位球員能夠承續前4年嘅學長,為粵華再次奪得冠軍,相信亦承擔咗好大嘅壓力,但今日嘅賽果證明你地所做嘅並無白費,為咗迎接每場賽事,可能犧牲咗好多學習或者空閒嘅時間,刻苦耐勞嘅操練,用心地學習,不斷提升團體合作同個人狀態,今日出色嘅表現能夠奪得冠軍,係實至名歸嘅。
各位球員,希望你地能夠銘記日常訓練過程、每次賽事所抱嘅態度,能夠將足球上所學到嘅人生道理、不屈不撓嘅精神,轉化到人生道路上,將來無論在學業或事業上,都能同樣地冷靜面對,不怕艱辛,勇往直前,必定能夠排除萬難,達到理想嘅結果。今日雖然贏得冠軍,但緊記不要過度自信同驕傲,持有謙虛嘅學習態度,努力學習人生道理,喺未來嘅人生道路上能夠繼續發光發亮。
除咗球員嘅努力,亦非常感激教練團隊嘅用心教導,同時非常感謝今日到場嘅校長、師生、學兄、好人,以及其他支持嘅朋友,全靠你地一點一滴嘅支持同鼓勵,推動咗粵華A隊發揮出超水準表現,成就咗粵華校隊能夠連奪5年冠軍嘅光彩紀錄。有幸我能夠帶領一支獲得校方全力支持,同時非常優秀嘅隊伍,令我近幾年不斷取得足球事業上嘅美好回憶,更令我人生添上無限光榮!多謝各位! 羅偉業上🙏🙏🙏

發佈留言

發佈留言必須填寫的電子郵件地址不會公開。 必填欄位標示為 *